شفت الذيب/ ...........زجل

شفت الذيب ضاحك والدم سايح فنيابو
والكلب ناعس قلبو وخا العين ساهرة..
شفت صحا مشاو وشحال مراض شابو
يد تسقيهم الهم..ويد للكاس عاصرة..
شفت العود إلا غضب ما يلين ركابو
وناس تحني راسها وتقول الريح واعرة..
شفت اللي يزير القفل ويسد عليه بابو
من شق نساه تبات الريح فدارو ساعرة..
شفت ناس جاو وشلا ناس غابو..
ناس تعاف اللقمة..والناس عالجوع صابرة..
شفت السبع إلى من الكبر طاح نابو..
تهيج الذياب عليه وتصبح فأرضو ضاسرة..
شفت الغزال حروف زينو فيها الناس دابو
تمحي اليام زينو وتصبح الناس منو نافرة..
شفت شلا بشر فالدنيا بالظلم سابو
ذلتهم مخفية..وهيبتهم قدام الناس ظاهرة..
شفت الطير الجايعة فالفجر إيلا غابو
فسما مولانا يرجعو فالعشية ببطون عامرة..
شفت وشكون يشوف فالدينا غير مكتابو
يا من خيب فعالو فيها واش تزيان ليك لاخرة؟

المصدر منتديات دفاتر مع تحيات ابو ايوب